Zami'n sy aasman tak hunar fisha'n chiragh hai- Poet Jawaz jafari

Zami'n sy aasman tak hunar fisha'n chiragh hai- Poet Jawaz jafari

 

                      غزل

            ڈاکٹر جواز جعفری

زمیں   سے   آسمان  تک  ہنر  فشاں   چراغ    ہے

جہاں  جہاں  ہے  تیرگی   وہاں  وہاں  چراغ   ہے

ہمیں   لہو  کی  نسبتیں  ہیں  زہرہ  و  نزار   سے

سو   ہم   ہیں  روشنی ٫ ہمارا  خانداں  چراغ  ہے

یہ کون عرضیاں  بہا  رہا  ہے  شب  کے  نیل  میں

یہ کس  جہان  کی  طرف  رواں دواں  چراغ  ہے

پلٹ   گیا   عدو    مرے   خیام   کے   نواح    سے

اسے  خبر  نہ  تھی  کہ  میرا  پاسباں  چراغ   ہے

یہ روشنی جو پھوٹتی ہے میرے حرف حرف سے

مری  زباں  کی  اوٹ  میں  کہیں  نہاں  چراغ  ہے

اسی   کی   روشنی   پہ   زندگی  کا  انحصار   ہے

یہ  جو   زمین  و  آسماں  کے  درمیاں  چراغ   ہے

جواز  آج  شب   ہوا   یہ   دیکھنے   کو   آئے   گی

کہاں  کہاں  ہے  تیرگی  ٫   کہاں  کہاں  چراغ   ہے