سحرتاب رومانی ایک منجھے ہوئے شاعر ۔ تحریر بابر شکیل ہاشمی

سحرتاب رومانی ایک منجھے ہوئے شاعر ۔ تحریر بابر شکیل ہاشمی 

 

تحریر(بابر شکیل ہاشمی) خوبصورت لب و لہجے کے منجھے ہوئے شاعر سحرتاب رومانی کی شاعری میں زندگی کے تمام رنگ پائے جاتے ہیں۔ میرا ان سے تعارف فیس بک پر ہوا ، قاری ان کے کلام اور مضامین کلام سے متاثر ہوئے بنا نہیں رہ سکتا۔

آپ کا اصل نام محمد نعیم ہے اور سحرتاب رومانی کے نام سے لکھتے اور ادبی حلقوں میں جانے پہچانے جاتے ہیں ۔آپ 1964 سندھ کے شہر خیر پور میں پیدا ہوئے، شاہ لطیف یونیورسٹی خیر پور سے گریجویشن کرنے کے بعد گونمنٹ کالج آف ٹیکنالوجی خیر پور سے ہی

مکینیکل ٹیکنالوجی میں ڈپلومہ حاصل کیا۔ اب مستقل طور پر کراچی میں رہائش پذیر ہیں ۔پہلا شعر 9 سال کی عمر میں کہا جس نے اہل خانہ اور عزیز و اقارب کو حیرت میں ڈال دیا، لڑکپن سے ہی سب آپ کی ادبی و شعری ذوق کے معترف ہو گئے، آپ 

صحافتی میدان میں بھی بھرپور خدمات سرانجام دے چکے ہیں جنگ ، جسارت اور روزنامہ ایکسپریس کراچی میں سحرتاب رومانی کے لکھے ادبی مضامین اور نامور ادبی شخصیات سے کئے گئے انٹرویو چھپتے رہےہیں جبکہ پاکستانی فلم کے حوالے سے چھپنے والے ہفت روزہ نگار سے بھی وابستہ رہے ہیں۔ روزگار کے سلسلے میں 15 سال عرب امارات کے شہر دبئی میں مقیم رہے اور ادبی محفلوں کی جان بنے رہے آپ کے 6 شعری مجموعے شایع ھو چکے ہیں جن کے نام

(1)۔ گفتگو ہونے کے بعد (2)۔ ممکن (3)۔ زندگی کے چاک پر (4)۔ دھوپ کے پار

(5)۔ شیشہ(6)۔ آتش دان میں خواب ، شامل ہیں ۔

سحرتاب رومانی کے کلام سے کچھ انتخاب احباب کی نذر۔

۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔

غزل ۔۔۔1۔۔۔۔ سحرتاب رُومانی

گھر کا ہر نقصان بھرے گا

دروازہ تاوان بھرے گا 

اُس سے خدشہ ایک یہی ھے

دیواروں کے کان بھرے گا

میری غربت صبر کرے گی

تیرا  دستر خوان بھرے گا

لادے گا پھر بعد میں ہم کو

پہلے وہ سامان بھرے گا

اپنے اک اک نیک عمل کا

خمیازہ انسان بھرے گا

خلقت پر افتاد پڑی تو 

چیخوں سے ایوان بھرے گا

وزرا تو سب عیش کریں گے 

قرضہ پاکستان بھرے گا

اچھا میں بھی دیکھتا ھوں چل

کب تک تُو زندان بھرے گا

دیکھوں گا میں خواب کہاں تک 

اب کے آتش دان بھرے گا

وہ آئیں گے گھر میں ہمارے 

پھولوں سے دالان بھرے گا

اتنا مت خاموش رھو تم 

دل میں اک طوفان بھرے گا

۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔ ۔۔۔۔۔۔۔۔۔۔۔۔

غزل   ---2-- سحرتاب  رُومانی 

سب کچھ  ایک اشارے  پر تھا 

دریا  رات کنارے پر  تھا 

ہوتا  روز منافع  تھا اور 

کاروبار  خسارے پر تھا 

وہ جو بانٹ  رہا تھا سائے 

کل  وہ پیڑ بھی آرے پر تھا 

اپنا حال  بتاتا  کیا میں 

میرا  حال  گزارے پر تھا 

اک  سیلاب  تھا  آنے والا 

سارا  شہر  منارے  پر تھا 

میں نے زیست  کی کشتی کو بھی 

چھوڑا  وقت  کے دھارے  پر تھا 

وہ  تھی رات  مرے پہلو  میں  ؟

یا  اک  چاند ستارے  پر  تھا   ؟

ہم  بدنام  ،  ہمیں  آوارہ  

ہر  الزام  ہمارے پر تھا 

کچھ  حالات مرے ایسے تھے 

لیتا  سانس  ادھارے  پر تھا

۔۔۔۔۔۔۔۔۔۔۔۔۔۔ ۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔

غزل ۔۔۔۔3۔۔۔۔ سحرتاب رُومانی

 

اک روز پھر ہجومِ نگاراں کی زشت سے

اِن آئنوں نے کام لیا سنگ و خشت سے

شاید میں اپنے آپ پہ ہوتا نہ منکشف

مجھ کو نکالتا نہ اگر تُو بہشت سے

پہلے یہ آگ اپنے گھروں کی بُجھا لیں ہم

نمٹیں گے جا کے بعد میں اہلِ کنشت سے

مانا کہ کائنات تِرا اختیار ھے

مجبور آدمی بھی ھے اپنی سرشت سے

احسان ہم نے کوئی فلک کا نہیں لیا

پیدا کیا ھے رزق بھی اپنی ہی کشت سے

کرتا نہیں ھوں بات کوئی کُھل کے اِس لیے

ڈرنے لگا ھوں میں تِرے ہونٹوں کی ہِشت سے

بہتر یہی لگا کہ میں خود کو نکال دوں

کیا کیا نکالتا میں سحر خود نوشت سے

۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔

غزل ۔۔۔4۔۔۔۔ سحرتاب رُومانی

 

اِس لیے بھی ذرا ھے چوکھا رنگ

میرے اشعار میں ھے میرا رنگ

شاعروں کو بہت پڑھا لیکن 

مجھ پہ آیا نہیں کسی کا رنگ

رنگ اُس کو دیا جو تھوڑا سا 

مجھ سے کہنے لگا کہ سارا رنگ

آپ لیجے گا نام میرا بس 

اور پھر دیکھیے گا اُس کا رنگ

میں نے دنیا ہی لی بدل اپنی

اِس سے پہلے کہ وہ بدلتا رنگ

جانے کیوں اجتناب میں نے کیا

سامنے تھا جہانِ رنگا رنگ

  

میں نے خاموش رہ کے بھی اکثر

گفتگو میں کیا ھے پیدا رنگ

اپنی اپنی پسند ھے ورنہ

سب سے اچھا ھے صوفیانہ رنگ

جو کسی طور بھی نہ پھیکا پڑے

چاہتا ھوں سحر میں ایسا رنگ