بنجر زمین پر کھلنے والا پھول ،"ساجد حمید" ۔ تحریر بابر شکیل ہاشمی "

بنجر زمین پر کھلنے والا پھول ،"ساجد حمید" ۔ تحریر بابر شکیل ہاشمی  

 

 تحریر(بابر شکیل ہاشمی) معروف شاعر اور مصور ساجد حمید اپنی شاعری اور فن_ مصوری کو جذبات  کے اظہار کا ذریعہ بنایا ہوا ہے ۔ آپ کی شاعری میں ہر رنگ پایا جاتا ہے خاص طور پر معاشرے کی ناہمواریوں کا درد ،  انسانی رویوں، موسمی تغیرات کے اثرات نمایاں نظر آتے ہیں ۔

ساجد حمید کا اصل نام محمد کاظم اللہ شریف ہے

آپ کے والد کا نام محمد قاسم ہے آپ 1954میں شیموگہ، کرناٹک بھارت میں پیدا ہوئے۔ بی ایس سی کرنے کے بعد محکمہ جنگلات کا کورس کیا اور محکمہ جنگلات میں بطور ڈپٹی کنزرویٹر آف فاریسٹ  خدمات سرانجام دیتے رہے۔ لڑکپن سے ہی اردو ادب پڑھنے کا شوق تھا ہلکے پھلکے شعر بھی کہنے لگے۔ ساجد حمید نے باقاعدہ شاعری کا آغاز 1974 میں کیا ۔ کرناٹک جو کہ ادبی حوالےسے ایک بنجر زمین سمجھی جاتی تھی اسے اپنی شاعری کے خوبصورت پھولوں سے مہکا دیا۔ ساجد حمید شاعری کی طرح مصوری میں بھی کمال مہارت رکھتے ہیں۔ آپ کی شائع شدہ کتابوں میں 

آ.  "یادوں کے مہتاب" غزلیں نظمیں

2. "نفی ضرب نفی"غزلیں نظمیں

3. "نکہت رقصاں" نظمیں

4. "جگنو لمحے" غزلیں، نظمیں

5. "بہت ذرا سا" غزلیں، نظمیں

6. کلیات 1.. لہو بادبان شامل ہیں۔ساجد حمید کے اعزازات میں 

آ. پاسبان گولڈن جوبلی ایوارڈ برائے شاعری

2. مجلس ادب ایوارڈ برائے شاعری

3. چلڈرن اکیڈمی ایوارڈ.. برائے شاعری

4. کرناٹک اردو اکیڈمی ایوارڈ برائے شاعری کے علاوہ 

شاعری پر کوئمپو یونیورسٹی سے ایم فل تفویض کی کی گئی ہے۔

آپ کا مشغلہ پڑھنا، لکھنا ہے۔ آپ کی پسندیدہ اصناف میں شاعری، افسانے، ناول اور تنقید ہیں ۔ بر صغیر پاک و ہند  کے تقریباً ً تمام معتبر رسالوں میں آپ کی تخلیقات شائع ہو چکی ہیں ۔

ساجد حمید کی شاعری کا نمونہ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نظم

۔۔۔۔۔۔۔۔۔

میں پرانا ہوا

زیست کے دائرے میں مقید ہوئے 

اک زمانہ ہوا

مسکراتے ہوئے ایستادہ جو اشجار

آنگن میں تھے

کٹ گئے 

بٹ گئے

دیو آسا جو سائے تھے رخصت ہوئے

طائرِ خوشنوا ہجرتیں کر گئے

ہر قدم حادثہ

اک نیا حادثہ

میری رگ رگ سے طاقت چرا لے گیا

دور آکاش پر 

ٹمٹماتے ہوئے

جو ستارے تھے خوابوں کے اوجھل ہوئے

زیست کا دائرہ تنگ ہونے لگا

دائرے سے نکلنے کی سب کوششیں

رائیگاں ہو گئیں

گھر کے دیوار و در بے یقینی کے عالم میں تکنے لگے

اور پھر دیر تک مجھکو تکتے رہے

لوگ ہنستے رہے

زیست کے دائرے میں مقید ہوئے 

اک زمانہ ہوا

میوزیم میں مجھے اب سجا دیجئے

میں پرانا ہوا

ساجد حمید

المیہ

زمیں کے سینے پہ دندناتے ہوئے سکندر

بھلا چکے ہیں

ثقافتوں کی سنہری خوشبو

روایتوں کی نوائے تاباں

حکایتوں کی صدائے شاداں

زمیں کے سینے پہ دندناتے ہوئے سکندر

نظر میں اٹھلاتی چار لمحو ں کی زندگانی کو

جاودانی سمجھ رہے ہیں

وہ اپنی آنکھوں کوضو فشانی سمجھ رہے ہیں

سوائے اپنے وہ سب کو فانی سمجھ رہے ہیں

زمیں کے سینے پہ دندناتے ہوئے سکندر

گنوا چکے ہیں ضمیر اپنا

بھلا چکے ہیں وہ اپنا ماضی ، وہ بیتی گھڑیاں

کہ۔۔۔۔ جب میسر نہیں تھا ان کو کوئی ٹھکانہ

جب انکی آنکھوں کی پتلیوں میں کرن نہیں تھی

جب انکے بازو کی مچھلیوں میں تڑپ نہیں تھی

جب انکے ذہنوں میں تیرگی کے سوا نہیں تھا کوئی اجالا

وہ ناتوانی، وہ خستہ حالی، وہ بے زبانی بھلا چکے ہیں

زمیں کے سینے پہ دندناتے ہوئے سکندر

بھلا چکے ہیں

ثقافتوں اور روایتوں کی دھنک جوانی

جو ذہن و دل کے طلسمی آنگن میں

چاندنی کو بکھیرتی ہے

جو جسم و جاں میں ثواب لمحے نچوڑتی ہے۔۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل

۔۔۔۔۔۔۔ 

شور کے اندر خاموشی ہے دیکھ ذرا

روح کے تار یہی بنتی ہے دیکھ ذرا

جل اٹھتے ہیں آنکھوں میں خوشبو کے چراغ

یاد بھی کیا تتلی ہوتی ہے دیکھ ذرا

شاخوں پر سہمی سہمی بیٹھی ہے ہوا

رنگِ فضا بھی بارودی ہے دیکھ ذرا

سلجھاتے سلجھاتے الجھن بیراگن

آخر خود ہی الجھ گئی ہے دیکھ ذرا

شام ڈھلی اور پنچھی لوٹ نہیں آئے

پیڑ کی رنگت اڑنے لگی ہے دیکھ ذرا

پر پھیلائے نیند پڑی ہے بستر پر

دھوپ ابھی آدھی نکلی ہے دیکھ ذرا

صحرا کی بیکل نظریں جب للچائیں

چپہ چپہ ریت جھڑی ہے دیکھ ذرا

بام و در کو چوم رہے ہیں سنّاٹے

دم سادھے خاموشی کھڑی ہے دیکھ ذرا

رات کے سینے پر ساجد کیا سر رکھ کر

درویشی سانسیں گنتی ہے دیکھ ذرا

…………………....................

غزل

۔۔۔۔۔۔

شعلۂ جاں سمٹ گیا معلوم

مل گئی خاک میں ہوا معلوم

میری آنکھوں سے جیسے ہی نکلی

کیوں ہوئی منتشر دعا معلوم

کر گئی ریزہ ریزہ ہر منظر

جانے کس کی نظر خدا معلوم

جس طرف موجۂ غبار اٹھا

اس طرف رنگِ شہر تھا معلوم

دشت ویراں کو کر گئی آباد

حسنِ بے سمت کی صدا معلوم

آرزو کے کھنڈر کی سانسوں میں

پھر مہکنے کو ہے ضیا معلوم

ڈھل گئے پتھروں میں عکسِ نفوس

کس نے پھونکا تھا سحر کیا معلوم

شب کا جادو رگوں میں پھیل گیا

بے نوا حرف کھل اٹھا معلوم

ذہن کی تہہ میں دفن برسوں سے

جو پڑا ہے وہ حادثہ معلوم

جھیل میں چاند کے اترتے ہی

سارا جنگل چہک اٹھا معلوم

مجھ سے بادل حمید پوچھتے ہیں

کیا خدا کا تمہیں پتا معلوم

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل

۔۔۔۔۔۔۔۔۔۔

 کبھی خود میں سما کر دیکھتا ہوں

کبھی خود کو ہٹا کر دیکھتا ہوں 

لگے ہیں ذہن و دل پر اتنے پہرے 

تری یادیں چھپا کر دیکھتا ہوں 

سنور جاتا ہے خاموشی کا صحرا 

تجھے جب گنگنا کر دیکھتا ہوں

مری بنیاد میں شاید کجی ہے

ابھی دیوار ڈھا کر دیکھتا ہوں

بہت شاداب منظر لگ رہا ہے

ذرا نزدیک جا کر دیکھتا ہوں

جو خوشبوؤں میں ڈھل جاتے ہیں لمحے

ہواؤں پر بٹھا کر دیکھتا ہوں

مرےاندر کوئی روتا ہے ساجد

چراغ دل جلا کر دیکھتا ہوں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل

۔۔۔۔۔۔۔۔۔

خود سے زور آزمائی کیاکرتےتے

ذہن تھے شل فدائی کیا کرتے

جب گناہوں میں کچھ مزہ نہ رہا

اوڑھ لی پارسائی کیاکرتے

اسمیں اپنا کوئی قصور نہ تھا

دل کی تھی نارسائی کیا کرتے 

دیر تک شام کو سنبھالے رہے 

اور سگریٹ جلائی کیا کرتے 

پھر لہو سے رقم فسانہ ہوا 

خشک تھی روشنائی کیا کرتے

 

شب گزرتی رہی پہ گزری نہیں

خاک اپنی اڑائی کیا کرتے

جب رگوں میں اندھیرے پھیل گئے 

ساجدم خودنمائی کیا کرتے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل 

۔۔۔۔۔۔ 

میں چاہتا ہوں کہ ہر شے یہاں سنور جائے 

تمہاری روح مری روح میں اتر جائے 

وہ اک خیال جو تھوڑا ملال جیسا ہے

ترے قریب سے گزرے اگر نکھر جائے

دہک رہا ہے جو مجھ میں الائو برسوں سے

ذرا سا آنکھ میں بھر لے کوئی تو مر جائے

زمانے بھر سے وہ بیگانہ کیا نہیں ہو گا

کوئی حیات کے مانند جب مکر جائے

وہ ایک خواب جسے گنگناتا رہتا ہوں

کبھی تو آکے مری آنکھ میں ٹہر جائے 

پھر اسکے بعد میں سوچوں گا اپنے ہونے کا

جو درمیان ہے لمحہ ذرا  نتھر جائے

کبھی حمید بلائے کبھی اسے ساجد

اکیلا چاند بتائو کدھر کدھر جائے