معروف شاعر عبدالعزیز کا تعارف اور شاعری ۔ تحریر بابر شکیل ہاشمی

معروف شاعر عبدالعزیز کا تعارف اور شاعری ۔ تحریر بابر شکیل ہاشمی 

 

تحریر (بابر شکیل ہاشمی )گلگت بلتستان سے تعلق رکھنے والے معروف شاعر عبدالعزیز خوبصورت شعر کہتے ہیں اور شاعری میں عزیز تخلص کرتے ہیں۔ آپ کے والد کا نام عبدالجبار ہے اور آپ گلگت بلتستان کے علاقے دنیور میں مقیم ہیں۔

اردو میں ماسٹرز کیا ہے۔شاعری کے میدان میں میٹرک کے زمانے سے طبع آزمائی شروع کر دی اور میٹرک میں ہی پہلا باقاعدہ شعر کہا۔پڑھنا آپ  کا اولین مشغلہ ہے جبکہ آپ شعبہ تدریس سے وابستہ ہیں ۔شعرو شاعری میں پروفیسر سحر انصاری صاحب آپ کے استاد ہیں کچھ سیکھا۔ پنجاب اور کراچی میں مختلف محافل شعر میں اکثر جلوہ افروز ہوتے ہیں اور اپنے کلام سے خوب پذیرائی حاصل کرتے ہیں۔اس وقت انجمن ترقی پسند مصنفین گلگت بلتستان کے صدر کی حیثیت سے خدمات سرانجام دے رہے ہیں ۔ابھی تک کوئی کتاب شائع نہیں ہوئی ، البتہ آپ کا ایک شعری مجموعہ زیر ترتیب ہے جو مستقبل قریب میں  منظر عام پر آ جائے گا۔ 

عبدالعزیز کا نمونہ کلام

 ۔۔۔۔۔۔۔۔۔۔۔۔۔    غزل 1  ۔۔۔۔۔۔۔۔۔۔۔

کوئی بھی نیند سے بیدار نہیں

دور تک صبح کے آثار نہیں

زندگی اتنا بتا دے کہ ترا

کون سا مرحلہ دشوار نہیں

نعرہ زن ابن علی کے لیکن

حیف ہے جرات اظہار نہیں

مسئلے اے مرے پیارے لوگو

ان گنت ہیں یہاں دوچار نہیں

اپنے ہاتھوں ِ ہوئے برباد عزیز

یہ کوئی شازش_ اغیار نہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

۔۔۔۔۔۔۔۔۔    غزل 2  ۔۔۔۔۔۔۔۔۔۔

جو خشک پات شجر سے گرا رہی ہے ہوا

خزاں کی دھول چمن سے اڑا رہی ہے ہوا

الٰہی! یہ کسی طوفاں کا پیش خیمہ نہ ہو

جو گھر کے صحن میں سیٹی بجا رہی ہے ہوا

درِ قفس سے گزر کر کہیں نہ آئی ہو

کسی اسیر کا نوحہ سنا رہی ہے ہوا

ازل سے اس نے اجالوں سے بیر رکھا ہے

چراغ خود نہیں بجھتے، بجھا رہی ہے ہوا

یہ کس حسین کا رخسار چھو کے آئی ہے

چمن میں آج شگوفے کھلا رہی ہے ہوا

نئی رتوں کو گزرنا ہے اب یہاں سے عزیز

اسی لیے تو یہ رستہ بنا رہی ہے ہوا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

۔۔۔۔۔۔۔۔۔۔۔  غزل 3  ۔۔۔۔۔۔۔۔۔۔۔۔۔۔۔

نخل غم سوکھتا بھلا کیسے

ہم نے اشکوں سے آبیاری کی

یہ ترے حسن کا کرشمہ ہے

جو بہاروں نے دستکاری کی

عمر بھر ہم زمین زادوں نے

آسماں تیری پاسداری کی

دودھ فرہاد لے کے آیا تھا

نہر کس نے لہو کی جاری کی

عشق معراج پانے والا تھا

ایک وحشت جنوں نے طاری کی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

۔۔۔۔۔۔۔۔۔۔۔۔  غزل 4 ۔۔۔۔۔۔۔۔۔۔۔۔۔۔

اشک سے آنکھ تر

زندگی بے ہنر

کتنے خاموش ہیں

شہر کے بام و در

بھول جا دل اسے

ٹھنڈی آہیں نہ بھر

یاد آتا ہے کیوں 

وہ مجھے اس قدر

باز آ عشق سے

اے دلِ بے خبر

چاند تکتا رہا

کل کسے رات بھر