سید غضنفر عباس کیف ایک ابھرتا شاعر ۔ تحریر بابر شکیل ہاشمی

سید غضنفر عباس کیف ایک ابھرتا شاعر ۔ تحریر  بابر شکیل ہاشمی 

 

تحریر (بابر شکیل ہاشمی) سید غضنفر عباس کیف ایک خوبصورت لب و لہجے کے ابھرتے ہوئے شاعر ہیں ۔ آپ کے والد کا نام سید عاشق حسین شاہ ہے اور آپ کا تعلق ٹوبہ ٹیک سنگھ سے ہے۔ گریجوایشن کے بعد میڈیکل کے شعبہ سے وابستہ ہو گئے لڑکپن سے ہی شعرو شاعری کا شوق رکھتے تھے۔ شاعری میں آپ کے استاد معروف شاعر جناب ڈاکٹر سید زیڈ اے بخاری ہیں ۔ صحافت میں بھی بھرپور دلچسپی رکھتے ہیں تاحال کوئی شعری مجموعہ منظر عام پر نہیں آیا آپ کی شاعری سے کچھ منتخب کلام قارئین کی بصارتوں کیلئے حاضر ہے

۔۔۔۔۔۔۔ ۔۔۔۔۔۔۔۔ ۔۔۔۔۔۔۔ ۔۔۔۔۔۔۔۔ ۔۔۔۔۔۔۔۔

غزل (1)

 چہرہ ہماری آنکھ کے پانی میں رہ گیا 

کردارِ عاشقی تو کہانی میں رہ گیا 

آئے کہاں سے لوٹ کے اب وقتِ انقلاب 

وہ جذبہ و جنوں سب جوانی میں رہ گیا 

ہم نے تو مسکرا کے انہیں الوداع کہا 

اشکوں کا ایک دریا روانی میں رہ گیا 

مجھ کو تو اس کے عیب بھی آئے نہیں نظر

دل دلربا کے حسن و جوانی میں رہ گیا 

لوگوں نے خامشی سے کئی گھر جلا دیے 

لیکن یہ کیف شعلہ بیانی میں رہ گیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل (2)

عہد و پیماں نبھانے سے قاصر رہا 

حسرتِ دل  بتانے  سے قاصر  رہا 

روز کرتا رہا خود سے وعدے مگر 

آپ کو بھول جانے سے قاصر رہا 

اپنی  دنیا  سمجھتا  رہا  آپ  کو 

نئے رشتے  بنانے  سے  قاصر  رہا 

میں قدموں میں رکھ کر یہ دستار بھی 

چند  روٹھے منانے سے قاصر رہا 

کیف جی اس قدر ہیں یہ مایوسیاں 

حقِ الفت  جتانے  سے  قاصر رہا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل(3)

 عاشقی کا مزہ ,,  بندگی کا سکوں

ہم کو حاصل نہیں عاجزی کا سکوں

کون مرتا ہے یارو کسی کیلئے 

چاہتے ہیں سبھی زندگی کا سکوں

گو یہ بننا سنورنا بہت خوب ہے

منفرد ہے مگر سادگی کا سکوں 

شدت ِ عشق کو وہ نہیں جانتے 

ہو میسر جنہیں دل لگی کا سکوں

قربتیں الفتوں کی ہیں قاتل میاں 

کیف جی خوب ہے تشنگی کا سکوں